ANG Philippine Drug Enforcement Agency (PDEA)-Northern Mindanao gikatakdang mopagawas og listahan sa mga barangay official nga lakip sa narco list kon nalambigit sa ginadili nga druga.

Si PDEA-Northern Mindanao agent Ben Calibre namahayag nga wala pay kamandoan gikan sa kaulohan ug magpaabot lamang sila sa order sa kabalakang mapaso.

Aminado si Calibre nga aduna gayud mga nalambigit niini ug sa tibuok nasod adunay natalang 300 nga naa sa listahan.

“Magpaabot mi ana nga order ugma’ng adlawa kay kami andam mi mohulat kon angayan ba namo ipagawas ang mga pangalan.”

Unang namahayag si PDEA General Director Aaron Aquino nga karong adlawa ibulgar ang pangalan sa mga nalambigit niini human aduna nay go signal si Presidente Rodrigo Duterte.

Una na nga gipasabot sa Department of Interior and Local Government (DILG) Northern Mindanao nganong dili nila mabulgar ang mga barangay official sa nagkadaiyang barangay nga anaa sa listahan sa druga dinhi sa nasod.

Atol sa gipahigayon nga Talakayan sa Philippine Information Agency (PIA) gipasabot ni DILG Northern Mindanao Director Arnel Agabe nga sa pagkakaron ilang buhatan walay gihuptan nga mga listahan sa mga opisyal nga nalambigit sa ginadili nga druga.

Adunay listahan niini apan anaa sa mga kamot ni Duterte ug kini lamang adunay katungod sa pagbutyag sa ilang mga pangalan.

Gipasabot sab sa Police Regional Office Northern Mindanao pinaagi sa tigpamaba nga si Police Superintendent Lemuel Gonda nga taliwala kadtong mga pangalan gikan na gipaubos og masusing beripikasyon apan dili kini basta nga mabulgar tungod kay posibleng adunay moreklamo nga paglapas kini sa ilang mga katungod.

Ang Commission on Elections, pinaagi ni Regional Director Atty. Renato Magbutay, namahayag nga kon unsa ang nakalatid sa balaod sa kwalipikasyon sa mga kandidato mao gihapon kini ang masunod karon panahona.

Una na nga miuyon ang Simbahang Katoliko nga unta ipagawas ang listahan sa mga opisyal nga nalambigit sa druga kay basin nagpapili og balik ug mahukman sa katawhan ug angayan nilang masayran kon masaligan ba kini sa pagsilbi sa ilang barangay aron dili magsakripisyo sulod pa gyod sa pila ka termino.