NALIPAY ang kagamhanan sa Kapitolyo Probinsyal sa aksyon sa gobyerno sa Korea nga ipabalik sa ilang nasod ang 5,100 ka mga toneladang basura nga kalit miabot nga walay insaktong papeles sa port sa Villanueva Misamis Oriental ug gibalhin sa Mindanao International Container Terminal (MICT).

Matud ni Provincial Administrator Jocelyn Matteo sa paghinabi sa sakop sa prensa, adlaw Lunes, Nobiyembre 26, nga nalipay sila sa desisyon sa Korea ug wala nagpasagad kay dili maayong kalit lang labayan og toxic nga mga basura ang usa ka lungsod sa lalawigan sa Misamis Oriental.

Sa kamandoan sa gobyerno sa South Korea buot nilang ibalik sa Korean ang tone-toneladang basura, human nihimo sa ilang kaugalingon nga imbestigasyon, nganong miabot ang 5,100 ka tonelada sa basura ngadto sa Verde Soko II Industrial Corporation sa Tagoloan.

Nagpagawas og pamahayag ang Ministry of Environment sa Korea Customs Service, ug ang Ministry of Foreign Affairs nga nainpeksyon na kini ug nadiskubre nga plastic waste, adunay mga sagol nga kahoy, metal, ug uban pa ang sulod niini nga wala miagi sa insaktong proseso sa pag recyle.

“Nalipay kita niana tungod kay dili gyod kadto maayo nga gitagaan kita sa ilang basura nga toxic,” pahayag ni Matteo.

Matud niini, kritikal kaayo ang waste disposal sa tibouk kalibutan tungod ang mga toxic waste delikado kon asa ibutang, ug dili buot niini ang probinsya ug nasod sa Pilipinas mahimong dumping ground sa mga basura.

Dugang niini, angayan na gyod nga sutaon sa Bureau of Customs ang mga gapangabot nga mga container van gikan sa laing nasod kay basin unya unsa na sab ang sulod nga posibleng maghatag kadaot sa lalawigan.

“Busa angayan gyod i-tsek kanunay kon unsay gapangabot gikan sa laing nasod diha sa MICT sa Tagoloan kay first time kini sa Misamis Oriental,” sugyot ni Matteo. (SVB)