DILI uyon ang Provincial Employment Services Office (Peso) sa job order ug kontraktwalisayon sa usa ka trabahante sa gobiyerno man o sa pribado.

Gibutyag ni Ezra Senining, sa Peso, nga kini tungod kay gikinahanglan sa usa ka empliyado ang seguridad nga siya maregular labina nga dili paingon sa pagkabata ang mga edad.

Mireak si Senining human nadawat ang taho nga dunay mokabat 856 nga mga gikontratang service workers gikan sa buhatan sa Department of Social Welfare and Development Office (DSWD) sa Northern Mindanao nga posibleng mawad-an og trabaho sunod tuig tungod sa usa ka joint circular gikan sa Department of Budget and Management (DBM) ug Civil Service Commission (CSC) nga mao ang Rules and Regulations Governing Contract of Service and Job Order Workers sa gobyerno nga magpahunong sa DSWD gikan sa direktang pagkuha sa mga gikontrata nga mga service workers.

Gipasabot sab niini nga kung hisgotan ang hiring sa gobyerno kaabag nila kanunay ang CSC tungod kay kini sila maoy magmonitor sa mga job-orders, casual ug regular nga naa nagtrabaho sa government agency.

Dugang niini nga sagad nga empleyado sa gobyerno nga mga job orders nagtrabaho lamang tungod sa usa ka proyekto. Kung naa pay project maoy trabahoun ug kon matapos ang proyekto matapos sab ilang panarbaho.

Naglaum si Senining nga matapos na kini nga pamaagi sa panarbaho.