NAGPANON sa Kapitokyo ang grupo sa kababayen-an atol sa pagpakayab sa nasudnong bandila aron hangyuon si Misamis Oriental Governor Bambi Emano nga ibalik ang programa niini nga Misamis Oriental Care System (MisOr Cares) nga suspendido na sugod pa niadtong bulan sa Hulyo.

Pipila kanila nga nainterbyu sa SunStar Superbalita Cagayan de Oro nisulti nga dako gyod ug gikatabang ang MisOr Cares kanila gumikan kay kung duna lang pamilite paingon sa ospital, libre na dayon nga matsek-ap ug makadala pa og tambal sa pagpauli kon adunay MisOr Cares apan karon galisod sila niini.

"Lisod gyod kaayo nga wala ang MisOr Cares kay gabayad mi sa ospital ug dili pareha sa una nga natsek up among mga anak nakadala pami og tambal. Sa pagpalubong sab, kumpleto na karon,, louy kaayo. Dako gyod og tabang namo mga kabus ang MisOr Cares, mao nga hangyo namo kang Gov Bambi nga ibalik na unta kini nila nga programa," matud sa usa ka taga Gingoog.

Si Emano niingon dunay positibo ug negatibo nga epekto ang gilusad sa pipila nga pagwelga pagpabalik sa iyang programa nga gimugna human nagbilin og utang ang kanhi administrasyon.

Gisulti sab niini nga walay puas iyang kaatbang niadtong piliay sa sige og ingon nga wala kini nakatabang.

"It has two sides. I think because people came to realize nga we all need Misor Cares and negatively because I know that they want Misor Cares but how I wish I'll be able to give it to them now but I can't," matud niini ug miingon nga nasabtan niini ang yangongo sa katawhan.

"I understand nga lisod sa pipila nga na suspend for the meantime ang MisOr Cares nga gitawag nga MisOr Kill sa atong kaatbang. Ang MisOr Cares gibuhat nato kay nakautang ang kanhi administrasyon kaniadto sa Philhealth ug dili na moenrol sa enrollees dili lang serbisyo panglawas apil pa ang pangkatalingbanon atong gihatag and many other services. Ang akong kaatbang walay undang sa pagpangdaot," matud ni Emano.

Gitimbang-timbang pa sab ni Emano kung dili ba magpareha ang MisOr Cares sa gikatakdang implementasyon sa Universal Health Care Law (UHCL) kon asa pilot province ang Misamis Oriental.

Sa pagkakaron, gipasabot Emano nga wala pay fixed nga date kanus-a ang implementasyon sa UHCL apan dili lang mabalaka ang katawhan sa lalawigan.

"Dili lang mabalaka kay kita man ang pilot province sa UHCL," matud sa gobernador, ug miingon nga kung aduna mga nagkinahanglan og tabang pinansyal lakip lungon, matubag ra kini sa lokal nga kagamhanan sa lungsod apan kung dili makaya sa lungsod, adunay Provincial Social Welfare Development (PSWD) nga andam motabang sa nagkinahanglan.

Sa iyang bahin sab ni MisOr Cares overseer Prexy Elipe, iyang gibutyag nga nahunong gyod ang operasyon karon sa programa ug gani ang ilang mga tawo aduna lamang mga consolidation nga gihimo kon unsay epekto kon walaon na gyod kini sa hingpit.

"Nagpasalamat ko sa ilang gibuhat nga gusto pa diay nila mabalik ang MisOr Cares. Kay kung dili na nila gusto, dili nalang ibalik," matud ni Elipe, kinsa midugang nga daghan sa Misamisnon ang nagtoo sa programa sa kaatbang tungod kay niadtong eleksyon mao man ilang gipili, hinungdan nagtoo siya nga mas epektibo ilang programa.

"Wala may laing kampanya nga gidala sa atong kaatbang sa mga tao maoy ilang gitouhan so maoy among nakita nga kung unsa ba gyod rason nganong gisuportahan sa mga tao ang mga kandidato nga supak sa MisOr Cares kay dili man pwede nga among serbisyo para lang sa sakop sa PaDayon Pilipino," matud ni Elipe.