GIBUTYAG ni 58th Infantry Battalion (58IB) commander Lieutenant Colonel Roy Derilo nga pabiling gi-monitor apan niadtong niaging piliay sa Mayo, napilde sa eleksyon kadtong mga pipila ka mga kandidato nga giingong gasuporta sa walhong grupo.

“Gi-monitor to nato sila ug kadtong eleksyon naay napilde,” butyag niini.

Dugang ni Derilo nga kadtong mga pulitiko nga nakuhaan og armas bag-ohay lang posibleng dunay kalambigitan sab walhong grupo ug gasuporta.

Kahinumduman gibutyag ni Derilo kaniadto nga walay kalainan ang mga pulitiko sa mga terorista gumikan kay wala nagsuporta sa paningkamot sa gobyerno nga mobalik sa sabakan sa gobyerno ang mga sakop sa New People’s Army (NPA).

“Kita sa gobyerno gapaningkamot nga manurender sila ug naa dayon ning mga pulitiko nga gasuporta nila. Unsaon nila pagpanurender kon ilang suportahan ang ilang mga pagkaon,” butyag niini kaniadto.

Gani usa sa mga rason sa pagpanurender mga walhong grupo gumikan sa kakapoy ug kagutom ug kung suportahan kini sila makapadugang kusog kanila ug samot nga dili manurender.