NAGHANGYO ang kapolisan sa Cagayan de Oro City Police Office (Cocpo) ngadto na sa mga buot nga magrally atol sa ikatulong State of the Nation Address (SONA) ni Presidente Rodrigo Duterte nga dili ilakip ang mga bata.

Matud ni Police Superintendent Mardy Hortillosa, tigpamaba sa Cocpo, nga ilang gi-respito ang katungod sa katawhan nga buot nga magpadayag sa ilang mga yangungo ngadto sa gobyerno apan naghangyo nga hatagan usab og respeto ang katungod sa uban pinaagi sa dili paghimo og mga kagubot.

Naghangyo usab ang kapolisan nga unta dili nalang magdala o ilakip pa ang mga kabataan sa susama nga mga kalihokan alang sa ilang seguridad.

“Amo sab nga sila gihangyo nga dili lang unta nila tugutan nga ipauban nila ang mga bata kay delikado kaayo para sa ilang safety,” tipik sa pahayag niini.

Nasayran nga magpahigayon ang grupo sa Bagong Alyansa Ng Pagbabago atol sa SONA diha sa Magsaysay Park, Divisoria ning siyudad sa Cagayan de Oro og pagrally sa halos siyam ka oras sugod alas 8:00 sa buntag hangtod na alas 5:00 sa hapon.