MIUBOS ang recovery rate sa Cagayan de Oro human nakatala kini og 20 ka mga bag-ong naka-recover nga mga coronavirus-positive nga mga pasyente.

Ang kinatibuk-ang ihap sa mga naka-recover nga mga pasyente miabot na sa 4,003. Ang recovery rate sa dakbayan anaa na sa 88.79 percent.

Sa maong 4,003, 304 ang mga locally stranded individuals (LSIs), 122 ang mga returning overseas Filipinos (ROFs), ug 3,577 ang mga lokal nga kaso (community: 3,028; Apors: 549).

Nakatala usab og 20 ka mga bag-ong kaso sa coronavirus disease (Covid-19) ang Cagayan de Oro.

Sumala ni City Health Officer Dr. Lorraine Nery, sa 20 ka mga bag-ong lokal nga kaso, siyam ang mga local index nga mga kaso, duha ang mga lokal nga authorized persons outside residence (Apors), ug siyam ang mga local case with link.

Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 4,508.

Sa 4,508 nga kinatibuk-ang kaso sa Covid-19 sa syudad, 435 ang mga ROFs/LSIs ug 4,073 ang mga local transmissions.

Ang Cagayan de Oro adunay 301 ka mga active cases, 97 niini na-admit sa Northern Mindanao Medical Center ug uban pang mga ospital sa syudad, 196 ang mga outpatients, ug walo ang mga ROFs/LSIs.

Ang ihap sa mga namatay sa Covid-19 sa syudad naa sa 204.