GIBUTYAG sa minority floor leader nga si kagawad Leon Gan nga nagpabilin gihapon ang koalisyon nila ni Rodriguez-Emano karong mga panahona ug mayorya pa gihapon matud ang mga Kapitan dinhi sa siyudad sa Cagayan de Oro.

“Oo nagpabilin man ang coalition, ubay-ubay paman gihapon tungod kay ang uban man ang loyalty nila naa man kay Mayor Emano, so mayorya lang gihapon na,” pahayag ni Gan.

Gipaabot nalang nila ang pinal nga desisyon gikan sa executive council sa partido ilabi na ni Mayor Emano kinsa ma’y chairman sa partidong Padayon Pilipino.

Giklaro usab niini nga andam na usab sila alang sa umaabot nga eleksiyon.

“Kung manok pa ni dugay ra nga gapanikad,” dalang pasi-aw ni Gan.

Dugang niini nga hangtod karon nagpadayon pa ang pagsabot-sabot sa ilang partido sa linya sa magpapili karong umaabot nga eleksiyon gani wala pa usab kini mibutyag kung magpapili kini sa pagka-kongresman base na usab sa hugonhugon o sa bisan unsa nga posisyon.