SUSPENDIDO karon ang pipila ka bus sa Super 5 human sa pagkahulog sa pangpang sa usa ka bus nga ningkalas sa kinabuhi sa drayber niadtong Pebrero 16 sa Sayre Highway, Purok 7, Upper Puerto, siyudad sa Cagayan de Oro.

Patay ang drayber nga si Rito Reyes, 47, taga Bagontaas, Valencia City, samtang ubay-ubay usab ang nasamdan nga mga pasahero.

Gibutyag ni Regional Director Aminoden Guro sa Land Transportation Franchising and Regulatory Board (LTFRB) nga i-suspenso ang bus nga susama niini og case number sa dili mosobra sa 30 ka adlaw labi na nga susama niini nga kaso nga dunay namatay ug mga samaran.

"In case of accident unya adunay death ug aduna'y mga injury, kinahanglan ato kini i-suspended within dili sab mosobra og 30 ka adlaw pending for investigation," matud ni Guro.

Gidugang pa niini nga ang financial assistance gikan sa bus company awtomatik nga ihatag ug ang mga biktima kinahanglan nga tigumon ang tanang nagasto sa balay tambalanan aron usab mabayaran.

Giklaro usab niini nga walay problema ang mga dokumento ug rekisitos sa operasiyon sa maong bus company.

Nasayran nga nag-isyu na og show cause order with preventive suspension sa Super 5 si Guro ug sa Pebrero 26 ang hearing niini.

Napulo ka unit ang susama og case number diin posibleng masuspenso apan magdepende pa kini sa imbestigasiyon sa hinungdan sa maong panghitabo.