USA ka sakop sa Road and Traffic Administration (RTA) ang gisukmag sa konduktor sa jeep tungod sa wala pagkasinabot sa trapiko niadtong alas 5 Huwebes sa hapon, Marso 7, sa Velez-J.R Borja Street, siyudad sa Cagayan de Oro.

Gibutyag ni RTA Enforcer naila nga si Eddie Carcosa, 34, minyo nga taga St. Ignatius, Macasandig ning siyudad, nga iyang gisita ang drayber sa jeep apan si Christopher Babalo, 33, taga Iponan ning siyudad ang nasuko.

“Gisita nako ang driver kay ga go man ang traffic light paingon sa Borja, siya man nuon nasuko, gihagit ko niya huboa imong uniform sumbagay ta, tingala nalang ko nga gibirahan ko niya diretso kaduha,” matud niini.

Samtang wala pa kini nakuntento ug nikuha og kagamitan sa front seat hinungdan nga nidagan palayo si Carcosa ug nakapaingon sa guwardiya ug nakakuha og batuta nga maoy gibalos sa maong kundoktor.

Nangayo usab og pasaylo ang konduktor ngadto sa iyang gihimo sa traffic enforcer.

“Kanang ingon niya gadala ko og kutsilyo dili na tinuod, nag-commotion mi kay gihangyo biya nako siya kay mingaw kaayo isa pa stop biya sir kay naa mi sa yellowbox, gitabangan kog kulata sa kauban niya RTA,” matud ni Babalo.

Ang maong insidente ang nakatala na sa buhatan sa kapulisan alang sa dugang nga imbestigasiyon ug tukmang disposasiyon.