GINADILI ang pagbaligya sa bisan unsa nga mga kalse sa ilimnong makahubog sa mga merkado subay sa City Ordinance 4373-94 sa siyudad sa Cagayan de Oro.

Sa seksiyon 466, klaro nga ginadili ang pagbaligya sa mga ilimnong makahubog sama sa tuba, whiskey, beer, brandy, gin, rum, champagne, ug uban pa lakip na usab sa pag-inom sulod sa merkado.

Sa pakighinabi kang Atty. Edgardo Uy, head sa Regulatory and Complaints Board (RCB), gibutyag niya nga klaro kaayo sa ordinansa nga ginadili gayud ang pagbaligya sa mga ilimnong makahubog sa mga merkado.

Gidugang pa usab niini nga kung adunay mamatikdan nga nagbaligya sa merkado, kinahanglan nga itaho dayon aron usab nga ilang mapaabot sa City Economic Enterprises Department aron nga mabadlong.

Nasayran nga anaa sa ordinansanga ang makalapas niining balaod mag-atubang sa multa nga P500 ngadto na sa P1,500 ug posibleng pagkabilanggo sulod sa dili mosobra sa upat ka bulan.