NAGPAHIMANGO ang Department of Health (DOH)-Northern Minadanao kalabot na sa mga rekomendasiyon sa steam inhalation o "tuob" gumikan kay wala kini napamatud-an nga makaayo sa mga nagbaton og coronavirus disease (Covid-19).

Gibutyag ni Dr. Ian Christian Gonzales, Infectious Disease Cluster head sa DOH-Northern Mindanao, nga ang tuob nahimo na usab nga traditional home remedy sa mga common cold o mga viral infection sama sa sip-on apan dili kini makaayo sa Covid-19.

Gidugang pa usab niini nga duna'y pagtuon nga gani na-published nga nagbutyag nga wala'y ebedinsiya nga ang pagtuob makapakalma bisan sa sintomas ug gani mas delekado hinuon kini labi na sa mga bata.

"There is no evidence that steam inhalation will alleviate even the symptoms, not even treatment but symptoms alleviation. No significant difference and ang secondary finding nila na study ni-increase nuon ang rate accidental scald burn sa mga bata," matud ni Gonzales.

Giingong kini nga practice o naandan na nga pagahimuon ang gi-diskorahe sa tinugyanan sa DOH.

"Dili na siya makatabang maka cause pa ta og injury tungod kay sa pagtuob tuob daghan pa nangapaso na hinuon, so highly discouraged siya nga practice," dugang pa.

Subay pa usab sa DOH nga mas importante pa gihapon nga padayunon sa paghimo o pagsunod sa mga gabayan o mga preventive measures.

"Dili pasabot nga nagtuob ta dili nata matakdan or ma-treat ang atoang Covid-19 kung naa man tay infection. Pinaka important gihapon atoang mga proven preventive measures sama sa paghugas og kamot, pagdistansiya sa laing tao, pagpuyo sa balay, pagsuot og mask," pahimangno ni Gonzales.

Gani gibutyag usab ni Dr. Bernard Julius Rocha, Medical Specialist II sa Northern Mindanao Medical Center (NMMC), nga wala pay tambal sa Covid-19 ug wala gyud girekomenda sa DOH ug bisan sa World Health Organization (WHO) ang tuob.

Giingong gusto nila nga mapasabot sa katawhan ang kadelekado sa paghimo niini imbes nga magpakonsulta sa mga doktor sama sa nahitabo sa pinakaulahing natalang patay nga covid-19 patient sa NMMC.

"Katong 34-year-old female kanang ga tuob-tuob siya bago siya niabot sa amoa na nisakit na ang tiyan dayon nagsukaha then pag-abot sa Northern Mindanao Medical Center was pronounced dead on arrival. Mao man na ang mga danger nga among gusto i-emphasized," dugang niini.