GIHAWOD sa Mower Internet Café-Tagbilaran City ang 1st Mayor Oscar S. Moreno Inter-team 2050 Open Chess Tournament niadtong Domingo sa Limketkai Mall, dakbayan sa Cagayan de Oro.

Naangkon sa Mower nila National Master Edcel Montoya, Norman Longjas ug Jerry Milan ang titulo agi pagblangko sa Aton Brothers-Davao City, 3-0, sa kulbahinam nga blitz tie-break atol sa championship match.

Naay tsansa modaug diretso ang Aton Brothers sa unang panag-agbat sa final showdown diin naa kang Warren Aton nakataya ang kadaogan.

Gikan sa one-all, dumaogay si Warren sa board three diin lamang siya sa posisyon og pyisa.

Apan, nasalbar ni Milan ang Mower human makit-an niya ang sakripisyo nga tira nga miresulta sa tabla agi sa perpetual check ug napaingon sa deadlock, 1.5-1.5, aron mapugos sa blitz tie-break.

Llamado kaayo ang Mower sa blitz tie-break tungod sa ilang eksperyensya sa pinaspasaay sa dula.

“Hinay gyud mi sa blitz. Maskin ako, wala ko makabantay sa clock nga hulog na ako oras,” ingon ni Irwin Aton, kinsa ang board one sa mag-igsoon.

Pag-angat sa final, bati an gang pagsugod sa Mower sa unang adlaw diin gisalubong sila og tabla kontra sa mga kiddie player sa Cagayan de Oro, 1.5-1.5, ug nahatdan sa ilang unang kapildehan anang adlaw.

Apan, bangis nibangon sila sa nahibiling upat ka dula sa sunod adlaw diin gimansahan nila ang Aton Bros sa kataposang eighth round aron masulod sa crossover match.

Nakalingkawas ang Mower ug Aton Bros kontra Suico Techno Group-PCPI ug Davao Eagles, sunod-sunod, agi sa kulbahinam nga blitz tie-break sa semifinal.

Niuli ang Mower sa P50,000 nga first prize, samtang naangkon sa Aton Bros ang P25,000 second prize.

Nahuman ang Davao Eagles sa third, samtang ang Suico sa ikaupat.

Gikan sa ikalima paingon ika-10 sunod-sunod ang Orbe, Toledo City, R-Can’z, Kap Gigi Go 23, Orbe’s Power Rangers ug Philippine Army Chess Team-DOJ.