NIAWHAG ang Bureau of Fisheries and Aquatic Resources (BFAR) 7 sa publiko hilabi na sa mga lumolupyo sa dapit nga di hilabtan o hikapon ang nasigpatan nga baby sharks sa baybayon sa lungsod sa Santander, Cebu.

Kini human nakompirmar sa BFAR 7 pinaagi sa Cebu Provincial Fishery Officer ug sa Municipal Agriculture Office ang presensya sa mga baby shark.

Matod ni Cebu PFO officer-in-charge Edgardo Delfin nga ang municipal fishery technician nila nitaho nga ang nidagsa sa baybayon mao ang juvenile blacktip sharks.

Kini nangita og mga pagkaon.

“People should not be afraid. The presence of these sharks does not pose danger especially to people swimming there. They do not bite not unless they are threatened or harmed,” matod ni Delfin, kinsa nagkanayon nga mopalayo ra usab kining mga bata nga iho kon makamatikod nga aduna’y tawo.

Dugang ni Delfin nga normal ra kining nakita ang bata nga iho sa dapit.

Makita ra kini sa Pebrero ug Marso. Isda nga gagmay usab ang kaunon niini.

Sanctuary

Gipahibawo usab sa BFAR 7 nga ang dapit diin nasigpatan ang mga iho sa Barangay Pasil, Santander usa ka marine sanctuary ug ginadili ang economic o fishing activity sa usa ka marine sanctuary.

Gipasabot usab ni Delfin nga tumong sa marine sanctuaries ang pagpreserbar ug pagprotehir sa isda ug palibot niini.

Tuod man, kining blacktip sharks makit-an usab sa mabaw nga dapit sa kadagatan.

Dugang usab niya nga mahimong tourist attraction ang dapit, apan gidili ang paghilabot niini ingon man pagsamok sa mga iho.

Ang pagkuha og iho ginadili sa Sugbo subay sa mga ordinansa sa Probinsiya ingon man giprotektaran usab kini sa local government units, sa munisipyo ug barangay pinaagi sa Bantay Dagat Group.