SAMA sa salida sa sine ang nahitabo sa manag-agaw nga nag-abot sa usa ka dapit, diin sila nagduwelo alas 10:50 sa buntag sa Sabado, Pebrero 6, 2021 sa Barangay Granada, lungsod sa Boljoon, Sugbo.

Usa kanila nasamdan human maigo sa giingong pinusilay samtang nagsige sila og “tambling” aron di maigo.

Si Adrian Anthony Derama Perello, 54, minyo, alias “Gabby,” minyo, traysikol driver, taga Barangay Poblacion, Boljoon, nadakpan sa hot pursuit operation sa kapulisan.

Naangol iyang ig-agaw nga si Jose Emmanuel Serna Derama, alias “Manny”, 62, minyo, taga Brgy. Poblacion.

Si Jose Emmanuel kanhi kandidato pagkamayor sa 2019 elections, apan naparot.

Naa siya sa usa ka pribadong tambalanan sa dakbayan sa Sugbo human maigo ang tuo nga batiis.

NGANONG NAG-AWAY

Si Police Staff Sgt. Erwin Oyao, imbestigador sa Boljoon Police Station nga nahinabi sa Superbalita Cebu, nagkanayon nga alas 9:00 sa buntag nagkalalis sila si Perello ug Derama.

Si Derama nibadlong kanila ni Perello ug mga kaubang traysikol driver sa parking area sa Brgy. Poblacion.

Wa siya makauyon sa grabing kasaba sa parkingan kay sila si Perello saba kaayo nagsigeg tan-aw sa “online sabong.”

Si Derama kinsa giingong hubog gikan sa gabii hangtod sa buntag, nikomprontasi kang Perello.

Ang duha daan nang dunay panagbangi, matod ni Oyao.

Nisulti si Derama nga gihagit siya og pinusilay ni Perello pinaagi sa usa ka duwelo.

Naputol ang ilang panaglalis human gibadlong si Derama sa iyang anak.

Duna man siyay tuyo sa lungsod sa Santander, niadto siya sakay sa iyang Mio nga scooter. Ang Barangay Granada maagian niya padulong sa Santander.

NAGPINUSILAY

Pag-abot niya sa tungod sa sementeryo, iyang nakit-an si Perello nga nag-park sa motorsiklo mao nga wala siya molahos, nihunong siya mga 15 metros ang gilay-on.

Iyang giablihan ang U-Box sa iyang motorsiklo, dihang kalit nga mibunot sa armas si Perello ug nipusil kaniya.

“Paglingi niya, buto-buto naman mao to nga mitambling na lang siyag taman pero na-igo gihapon iyang batiis,” dugang ni Oyao.

Sa tanto niyang tambling, sigeg tira si Perello hangtod nga nahurot ang bala, nagdali pagsibat.

Ang biktima nga nasamdan gidali pagdala sa Rosales Hospital sa Dalaguete, apan gibalhin sa dakbayan sa Sugbo.

Matod ni Oyao nga si Perello ilang nadakpan alas 12 pasado sa udto sa balay sa iyang higala sa Brgy. Poblacion.

Si Perello nibutyag nga nagpinusilay silang duha ni Derama dihang nag-abot atubangan sa sementeryo.

Pero dihang nahurot iyang bala, nisibat siya ug gilabay ang iyang armas ug wa na siya masayod kon asang dapita.

Dugang ni Oyao nga ilaha pang estoryahon pagbalik si Derama sanglit nagtuo sila nga armas ang gikuha niini sa U-Box pero wala na didto sa motorsiklo dihang ilang gisusi.

“Ana gud ang suspetsado nga pagsinukliay nilag bala, tambling sab siya, murag pelikula,” asoy ni Oyao.

Ang kapulisan nakarekuber sa crime scene og 12 mga kabhang sa 9mm pistol, apil na ang Honda nga motorsiklo ni Perello ug Mio nga scooter ni Derama.

Kasong frustrated murder ang giandam sa kapulisan nga ipasaka batok kang Perello.