Usa ka 59-anyos nga barangay health worker (BHW) nasikop base sa warrant sa korte tungod sa giingong paghupot sa illegal nga druga ug drug paraphernalia sa Barangay Tutay, Pinamungajan, habagatang-kasadpan sa lalawigan sa Sugbo sa Miyerkules sa kaadlawon, Agusto 24, 2022.

Si P02 Christian Ortega, assistant investigator sa Pinamungajan Police Station, niila sa suspek nga si Merlin Capistrano, lumad nga taga Abgao, Southern Leyte, apan nanimuyo na sa Tutay.

Si Ortega nisaysay sa SunStar Cebu nga si Capistrano kakunsabo sa iyang live-in partner nga si Alberto Papasin, taga Tutay, Pinamungajan, kinsa wala sa ilang balay atol sa pagsikop kang Capistrano.

Si Judge Romero Gomez sa Maasin City Regional Court Branch 25 niluwat sa duha ka warrants of arrest sa Oktubre 28 ug Nobiyembre 6, 2005 sa kalapasan sa RA 9165 o Comprehensive Dangerous Drugs Act of 2002, Section 1, paghupot sa drugas ug Section 2, paghupot sa drug paraphernalia.

Sila si Capistrano ug Papasin wala nakapiyansa sa P200,000 nga gitakda sa korte alang sa ilang temporaryong kagawasan.

Si Lieutenant Colonel Vicente Bullecer Jr., acting chief sa Maasin City Police Station sa Southern Leyte, nagkanayon nga sila si Capistrano ug Papasin dunay anak nga kasamtangan nga nagtungha og Criminology course.

“Dapat ila na lang gyud ni atubangon ang kaso kay naa ra ba sila anak nga nag-eskwela para mahimong pulis. Unya masangit unya ni sa iyang application kay naay record ang mga ginikanan kahabin sa drugs,” matod ni Bullecer.