GANG war misi-aw sa lungsod sa Cordova, Sugbo nga nikalas og usa ka kinabuhi.

Usa ka gang member nga gituohang gidumtan sa karibal niini nga pundok ang gipusil sa gituohang menor de edad nga gunman.

Giila ni SP01 Erwin Gedorio sa Cordova Police Station ang namatay nga si Lyndo Bering, 23, traysikad drayber, taga-Barangay Babag, Lapu-Lapu City, apan temporaryong nipuyo sa iyang kaliwat sa Sityo Camolinas, Barangay Poblacion, Cordova.

Matod pa ni Gedoria nga si Bering miyembro sa True Brown Style (TBS) gang.

Samtang kini nagkaon og noodles sa Crossroads, Barangay Poblacion niadtong Huwebes sa kaadlawon, gipusil kini sa riding-in-tandem.

Multiple gunshot wounds ang naangkon sa biktima nga miresulta sa iyang kamatayon. Gihulagway sa mga saksi nga ang namusil mga menor de edad base sa paghulagway sa iyang bayhon.

Aduna nay person of interest ang kapulisan nga gisubay ug gidudahan nga sakop ra sa MC Ganja gang nga matod pa ribal sa TBS gang. Dugang pa ni Gedoria nga gisubay sab nila kon aduna bay kalambigitan sa illegal drugs ang maong pagpamusil o ang posiblidad nga panagbingkil sa duha ka gang. FVQ