ANG Department of Health (DOH) 7 nakatala og 16 ka bag-ong mga kaso sa coronavirus disease (Covid-19) sa Dakbayan sa Sugbo sa Martes, Disyembre 29, 2020.

Tungod niini, nisaka na usab ang aktibong mga kaso sa Covid-19 ngadto sa 96.

Si Dr. Michelle Linsalata, assistant department head ug officer-in-charge sa Cebu City Health Department (CCHD) nagkanayon nga base sa ilang gihimo nga contact tracing, ang 15 sa mga natakdan adunay close contact sa unang mga pasyente nga positibo sa miaging mga adlaw.

Iyang gitug-an nga kon subayon, ang Cebu City aduna lay usa ka kaso sa Covid-19 nga di close contact sa mga masakiton.

“According to our contact tracing data, of the 16 reported new cases for Cebu City, 15 are close contacts of a previously reported positive case and only 1 is an “actual fresh case,” pagpasabot ni Linsalata.

Ang protocol nga gisubay sa Emergency Operations Center (EOC) sa City Government, diin sakop si Linsalata, mao ang pag-swab sa tanang mga close contact sa mga positibo sa Covid-19.

Human niini, sila dad-on sa quarantine facilities para pagtiwas sa 14-day quarantine bisan wa pa ang resulta sa swab test.

Nanagana na hinuon daan ang Siyudad ingon man ang Department of Health (DOH) sa posibleng pagsaka sa mga kaso panahon ning Pasko.

Liboan ka mga tawo ang nanambong sa mga Misa de Gallo sa mga simbahan.

Sa unang duha ka mga adlaw, wa masunod ang social distancing protocol sa pipila ka mga simbahan.

Busa gipatuman sa hugot ang social distancing sa mga parokya pinaagi sa pagbutang og stickers sa karsada ug mga lingkuranan nga gipanglak-angan nag labing minos usa ka metro ingon man TV screens sa gawas sa mga simbahan.

Hugot usab nga gimando ni Mayor Edgardo Labella ang pagsul-ob sa face mask ug shield sulod ug gawas sa mga simbahan.

Si Labella niseguro hinuon nga ang Siyudad nangandam sa posibleng pagsaka sa mga kaso. (PAC)