ANG 10 sa 11 ka mga barangay sa isla sa Olango, dakbayan sa Lapu-Lapu girekomindar nga ideklarar nga “drug-free barangay” human nga ang Barangay Caubian sa maong isla nadeklarar nga luwas na sa illegal drugs.

Ang maong mga barangay naglakip sa Baring, Caw-oy, Sabang, Santa Rosa, Talima, Tingo, Tungasan, San Vicente, Caohagan ug Pangan-an.

“There’s an endorsement nga ipa-drug clear ang barangay. Most of those are from Olango,” matod ni Mayor Paz Radaza.

Gipahibawo ni Sr. Supt. Rommel Cabagnot nga ila nang giduso ngadto sa Department of Interior and Local Government (DILG)7 ang rekomindasyon samtang ang Philippine Drug Enforcement Agency (PDEA) maoy mo-validate.

Si Radaza, sa iyang bahin, mopasusi sa ubang mga barangay ilabi na sa mainland Lapu-Lapu diin adunay grupo nga mopahigayon sa monitoring gikan sa city mayor’s office.

Kahatagan na sab og kasayon ang kapulisan sa kampaniya batok sa ginadiling drugas sa pagkahuman og tukod sa Task Force Kontra Drogas nga maoy tahasan sa prevention ug rehabilitation drive batok sa illegal drugs.

Sumala pa ni Cabagnot nga ang TF Kontra Drogas office magsilbi nga secretariat nga maoy moatiman sa dokomento sa tanan nila nga operasyon.

Gisubhan kagahapon ang bag-ong natukod nga buhatan sa Task Force Kontra Drogas ug Task Force Malasakit pinangulohan ni Radaza, city hall officials ug city police office.

Samtang ang Task Force Malasakit magsilbing dangpanan sa kababayen-an ug kabataan nga biktima sa pangabuso.