USA ka ba sa apektado unta sa wa’y agas sa tubig karong umaabot nga Miyerkules Santo ug Huwebes Santo?

Ayaw kabalaka, kay giuswag sa Metropolitan Cebu Water District (MCWD) ang maong service interruption ug dili una kini mahinayon.

Matod ni Charmaine Rodriguez-Kara nga mas maayong i-postpone una kini samtang aduna’y crisis sa tubig nga nasinati.

Lakip unta sa maapektohan ang unom ka mga lungsod ug dakbayan sa Compostela, Liloan, Consolacion, Mandaue City, Lapu-Lapu, Mabolo, North Reclamation Area, Pier area, Carreta, M.J. Cuenco Ave., Lorega-San Miguel, T. Padilla, Tejero, Tinago, parte sa dan Imus, sa Dakbayan sa Sugbo.

Nasayran nga himuon unta ang desilting sa usa sa service providers sa MCWD nga Cebu Manila Water Development Inc. sa lungsod sa Carmen isip pagpangandam sa panahon sa ting-uwan.

Dugang ni Kara nga desisyon sa MCWD nga dili una kini himuon aron dili mag-antos ang kadaghanan nga nihit na kaayo ang agas sa tubig subay niining panahon sa ting-huwaw.