Gipangita na sa Parian Police Station sa Cebu City Police Office (CCPO) ang 14 anyos nga lalake nga nakapusil og 15 anyos nga lalake niadtong Huwebes sa kaadlawon, Enero 20, sa dalan MJ Cuenco, Barangay T. Padilla, dakbayan sa Sugbo.

Matod ni Police Executive Master Sergeant Rommel Bancog, imbestigador sa Parian Police Station, adunay grupo sa mga batan-on nga taga Barangay Tinago nga nanggawas bisan kaadlawon na.

Ang biktima nga 15 anyos uban sa iyang mga higala nagbaktas lang sa daplin sa karsada, apan ilang nakasugat ang grupo sa 14 anyos.

Ningduol kini kanila ug walay daghang, estorya gilabay sila og botelya nga maoy hinungdan nga mibawos usab ang grupo sa 15 anyos sa paglabay kanila.

Apan kalit lang nga mipaka ang buto sa armas kay gipusil na diay ang 15 anyos sa 14 anyos tumong sa abaga.

Dali nga ningresponde ang Emergency Medical Service (EMS) sa Barangay T. Padilla ug gidala ang samaran sa Cebu City Medical Center.

Giingong selos ang hinungdan sa pagpamusil nga maoy hinungdan nga nagdumtanay ang duha ka mga grupo.

Sigun ni Bancog nga nailhan nila ang suspek apan ang problema kay dili nila kini mapasakaan og kaso tungod sa iyang pangidaron.

Apan si Police Lieutenant Colonel Wilbert Parilla, deputy city director for operations sa CCPO, nagkanayon nga ilang ipasusi kon tinuod ba nga 14 anyos ang namusil kay kon tinuod, dili sila makapasakag kaso niini.

Giangkon ni Parilla nga dugay na kini nila nga problema sanglit dunay balaod nga naghatag og proteksyon sa mga menor de edad, apan gikinahanglan pini og pagsusi sa psychologist kon naa ba siya sa kahiamgo sa paghimo sa krimen.

Gimandoan niya ang Parian Police Station nga hingusgan pa ang ilang police visibility sanglit sa maong oras wala nay gitugotang menor sa gawas. / AYB, BBT