Katorse ka mga armas gisakmit sa kapulisan sa dakbayan sa Mandaue pinaagi sa ilang usa ka buwan nga “Operation Katok” human nga ilegal kining gibaligya sa gun owners.

Ang Operation Katok usa ka programa sa Philippine National Police diin manuktok sila sa mga balay sa mga nanag-iya og armas nga wala na maka-renew sa ilang lisensya.

Base sa press release sa MCPO, adunay natala nga 52 ka mga armas nga ilegal nga gibaligya ngadto sa laing tawo nga wala pa makakuha sa mga kinahanglan nga lisensya o permit.

Lakip niini ang giimbargo nila nga 14 ka mga armas human sa usa ka buwan nila nga operasyon ug gi-deposit sa nagkalain laing mga buhatan sa kapulisan sa Region 7 ug Region 9.

Gani, siyam ka mga indibidwal lang ang nakaproseso sa pagpanag-iya sa mga armas nga gipamalit.

Gitutokan kini sa Mandaue City Police Office (MCPO) tungod sa nagkadaghan nga mga indibidwal nga na-expire na ang lisensya karong panahon nga nagkaduol na ang holiday ug eleksyon.

Kini aron malikayan sab ang paggamit sa dili lisensyado nga mga armas labi na sa mga indibidwal nga lakip sa gang, o mga pribadong armado nga grupo nga mobuhat og krimen sama sa murder, robbery ug extortion.

Nipahimangno si Police Colonel Roland Bulalacao, pangu sa MCPO ngadto sa mga nanag-iya og mga armas nga dili rehistrado nga illegal nga mibaligya, nga itahan ang maong mga armas sa labing duol nga police station kundili sila gusto nga pasakaan og kaso. (KFD)