NATAKBUYAN sa coronavirus disease 2019 (Covid-19) ang 14 ka mga pulis sa Central Visayas.

Nasuta kini human sila gipaubos sa swab test sa miaging simana.

Matod ni Police Brigadier General Ronnie Montejo, hepe sa Police Regional Office (PRO)-Central Visayas, nga dali nga gipahimutang sa isolation area ang mga personnel.

Sila gi-monitor pag-ayo sa Regional Health Service-Central Visayas.

Gisubay na usab kon asa nila nakuha ang virus ug kinsa usab ang ilang nahimamat aron mapaubos usab sa swab test ug ipa-quarantine sulod sa 14 ka adlaw.

Gihulagway niya nga asymptomatic ang mga pulis.

"Lahi-lahi nila nakuha ang virus. Ang uban nakuha sa work places, sa mga nakahimamat nila. Ang uban sa nakauban sa conferences or unsa nya ang uban sa balay nila," matod ni Montejo.

Nadugangan usab ang natakbuyan sa Cebu City Police Office human nigawas Enero 21, 2021 ang positibong resulta sa usa ka babaye nga nadestino sa police station.

Matod ni Police Colonel Josefino Ligan, hepe sa CCPO, nga ang maong personnel naa na sa isolation area ug gilusad dayon ang contact tracing.

Aron dili modaghan ang mga matakdan sa virus, gimandoan ni Montejo ang matag police station nga palamboon nila ang ilang station health unit diin matag adlaw monitoron ang panglawas sa tanang personnel.