PATAY ang drayber human gipauwanag mga bala sa wa mailhing suspek niadtong Dominggo sa alas 9:00 sa gabii didto sa Brgy. Liki, lungsod sa Balamban.

Si Allan Alferez Aroba,36, taga Das Quarry, Brgy. Don Andres Soriano, dakbayan sa Toledo, patay human natusaktusak sa mga bala ang ulo ug kalawasan.

Si SPO3 Benedicto Bobilles, imbestigador sa Balamban Police Station, nga nahinabi sa Superbalita Cebu nagkanayon nga si Barangay Kagawad Victoriano Sumbal maoy nagpahibawo sa ilang buhatan kabahin sa usa ka lalaki nga gipusil patay nga nakit-an.

Si Bobilles nagkanayon nga sa pag-abot nila naglunang na sa kaugalingong dugo ang biktima nga way kinabuhi dihasa karsada samtang ang motorsiklo niini nag-andar.

Matud niini nga unang nakakita sa biktima ang usa ka Nicole Cojena, taga Amacan, lungsod sa Asturias.

Naagi si Cojena, sakay sa motorsiklo dihang nakit-an niya ang biktima hinungdan nga gipahibawo niini sa mga opisyal sa barangay.

Nasuta nila nga dunay samad pinusilan sa ulo, tiyan ug ubang bahin sa kalawasan.

Narekuber ang duha ka kabhang ug tulo ka bala sa kalibre .45, ug usa ka deform slug sa bala.

Si Bobilles miingon nga wa pa nila masuta unsay motibo sa krimen.

Nagpadayon pa sila sa pagpanguhag dugang background sa biktima aron masubay kun nganong didto kini sa dapit naabot nga layo kaayo sa ilang lugar.

Sa laing bahin, patay ang usa ka 17 anyos nga lalake human girakrakan sa wa pa mailhing suspek samtang nagduwa didto sa may G. Ouano St., Brgy. Opao, dakbayan sa Mandaue kagahapon sa kadlawon.

Nakaangkon og daghang samad-pinusilan ang biktima nga si Syle Cantillep ilabi na a iyang dughan atol sa insidente mga ala 1:20 sa kadlawon.

Matod ni P/SInsp. James Conaco sa Station 5 sa Mandaue City Police Office (MCPO) nga base sa ilang imbestigasyon nga ang biktima nga taga- Purok Rose sa dapit nagduwaduwa pa og buwan-buwan uban iyang mga higala sa wa pa ang insidente. (GPL , JPP)