Namatay ang 17-anyos human nadasmagan sa multicab nga gimaniho sa iyang ig-agaw alas 12 sa udto sa Huwebes, Mayo 5, 2022 sa Brgy. Mananggal, lungsod sa Dalaguete.

Gisikop sa kapulisan si Robert S. Sombilon, 21, manakaay og lubi, nagpuyo sa nahisgutang dapit, human niya nadasmagan si Jiemel Marzon Sombilon, tinun-an sa Grade 11.

Si Jiemel patay nang niabot sa Argao District Hospital.

Matud pa ni Police Major Gilfred Baroman, hepe sa Dalaguete Police Station nga nahinabi sa Superbalita Cebu, nga ang multicab gipanag-iya sa uyoan sa mag-agaw.

Gi-park kini kilid sa punoan sa lumboy samtang si Jiemel naglingkod sa may punoan niini.

Si Robert nga way lisensiya nisakay sa multicab nga wala mananghid, iya kining gipaandar.

Iyang gipadagan ang multicab apan nidiretso kini sa pagbangga sa biktima nga naglingkod ilawom sa punoan sa lumboy.

Si Jiemel naguroy sa ilawom sa sakyanan, nakaangkon og grabing kadaot sa iyang ulo ug kalawasan.

Si Robert gitanggong samtang giandam sa kapulisan ang tukmang kaso nga ipasaka batok kaniya.