MIBAHAD ang pangulo sa Philippine Drug Enforcement Agency (PDEA) 7 batok sa duha ka mga barangay kapitan sa siyudad sa Sugbo nga wala mokoooperar sa barangay drug clearing program sa gobiyerno.

Matod ni Director Levi Ortiz sa PDEA7 nga sa pagkakaron susihon pa una nila nganong wala sila mosuporta niining maong programa.

Kuwestiyonable ang gipakita nga lihok sa duha ka mga pangulo sa barangay, sumala ni Otiz.

Dugang niya, kon masuta nga nagmagahi sila sa pagkooperar mahimong mag-atubang sila og kasong criminal ug administratiba.

Apan wala lang una nganli ang duha ka mga barangay kapitan sanglit ila pa kining ipaubos sa imbestigasyon tungod sa kuwestyonable nga lihok niini.

Una nang mireklamo ang hepe sa Cebu City Office for Substance Abuse Prevention (COSAP) Jonah John Rodriguez nga adunay duha ka kapitan, usa niini naa sa bukirang dapit, ang wala mokooperar kanila sa ilang programa.

“Ug dili gyud sila maka-comply ug dili pud sila mo-cooperate na depende sa atong available ebidensya ato gyung filan silag admin or criminal case,” matod ni Ortiz.

Pasabot niya nga dako kaayo ug matabang ang barangay officials sa drug clearing program sa gobyerno sanglit sila man ang nasayod kinsa ang nalambigit sa illegal nga drugas sa ilang lugar.

Ang trabaho sa PDEA, matod ni Ortiz, mao ang paggiya sa barangay unsaon nga mahimong drug cleared sila.

Hinuon sa 80 ka barangay sa dakbayan sa Sugbo, wala pay mapili sa pagkakaron nga mahimong drug cleared sanglit giila man kini nga pulos adunay problema sa illegal nga drugas.

Apan matod ni Ortiz, naningkamot ang mga barangay nga kadtong nithan niadtong upat ka tuig na ang nakalabay ma-monitor kon mibalik ba kini sa ilang bisyo sa paggamit ug pagpamaligya sa ilegal nga drugas sa ilang dapit.