DUHA ka mga notadong tulisan o akyat bahay nga pulos wanted ang nadakpan sa Brgy. Lipata, lungsod sa Minglanilla niadtong Martes, Septiyembre 15, alas 4:30 sa hapon.

Si Junjed Camos, 30, alias 'Enting', ulitawo ug nagpuyo sa nahisgutang dapit nasikop uban sa iyang silingan nga si Kerikton Bacarisas, 40, ulitawo alias 'Diablo'.

Si Police Executive Master Sgt. Zosimo Rabanes, sa Anti-Kidnapping Group (AKG7) Visayas Field Units (VFU)uban sa mga kaubanan niini maoy nangulo sa pagsikop sa mga suspetsado.

Si Rabanes nga nahinabi sa Superbalita Cebu nagkanayon nga ang pagsikop nila sa mga suspek pinasikad sa warrant of arrest sa kasong robbery by the use of force upon things nga gi-isyu ni Judge Dennes Larrobis, sa RTC7 branch 76 sa dakbayan sa Naga.

Ang warrant gipitsahan sa Septembre 11, 2020.

Ang kaso nagsugod niadtong Marso 2019 dihang dul-an sa usa ka milyon ka pesos nga balor sa mga mahalong nagkadaiyang klase sa alahas ug mga butang nawala dihang gisaka nila ang panimalay sa usa ka Jennifer Villarazo sa Kingwood’s Village sa Barangay Linao Lipata.

Ang duha ka mga notadong tulisan nasikop gumikan sab sa pag-abag ni Kapitan Lino Ong sa Lipata.

Si Rabanes nibutyag nga si Camos, bag-uhay lang nakagawas sa kasong illegal possession of firearm niadtong Biyernes, Septiyembre 11.

Samtang si Bacarisas, kanhi nasulod sa Operation Second Chance sa Kalunasan, dakbayan sa Sugbo niadtong 2010-13 nga nag-edad pa og 16 sa kasong pagpanulis. (GPL)