DUHA ka gitumbok nga mga durugista sa dakbayan sa Mandaue napatay sa managlahing mga sitwasyon, Huwebes sa gabii, Disyembre 6, ug kagahapon sa Biyernes sa kaadlawon, Disyembre 7.

Usa sa napatay ang usa ka kanhi traffic enforcer sa Traffic Enforcement Agency of Mandaue (TEAM), nga si Eduardo Baclohan, 32, taga sitio Villamanga, Brgy. Umapad, Dakbayan sa Mandaue.

Napusilan-patay atol sa buy-bust operation pasado alas 7 Huwebes sa gabii, Disyembre 6, sa gawas sa ilang balay si Baclohan, kinsa maoy subject sa drug bust operation sa Opao Police Station (Police station 5).

Matod ni Police Chief Inspector Mercy Villaro, tigpamaba sa Mandaue City Police Office, nga nakadawat og taho ang PS5 kalabot sa pagpamaligya og shabu ni Baclohan human gitaktak sa TEAM.

Nagsugod kini og absent without official leave (Awol) dihang nagdumili pagpapaubos sa random drug test sa mga traffic enforcer sayo ning tuiga.

Sud sa pipila ka bulan nga siya gipanid-an human nitumaw ang ngan sa drug watch list.

Atol sa operation, giingon nga nakamatikod kini nga pulis ang gi-transaction, nidagan palayo ug dayon bunot ug tion sa iyang armas. Ang back-up nga pulis nga nakabantay, nakapusil kang Baclohan.

Dali unta siyang gidala sa tambalanan, apan gideklarar nga dead on arrival.

Nakuha gikan kang Baclohan ang 11 ka mga pinakete sa shabu.

Pasado alas 4 kagahapon sa kaadlawon, Disyembre 7, si Lemuel Guardiana, 28, alyas Pido, gipusil-patay sa duha ka mga lalake nga naka-bonnet sud sa iyang balay Upper Tabok 1, Barangay Tabok.

Giingon nga gikan nag-bingo si Guardiana ug nagduwa og online game, gisulod kini sa ilang balay sa mga mamumuno dayon gipusil sa makadaghang mga higayon.

Sa pakisusi sa kapulisan, posibleng onsehan sa drugas ang hinungdan sa pagpatay kay kanunay sila makadawat og report gikan sa ubang mga dinakpan sa Basak police station nga usa kini sa komprahan o baligyaan apan daghan nang naglagot kay di mo-remit sa halin o di mobayad.

Drug surrenderer si Guardiana niadtong 2016, apan giingong nagpadayon sa pagpamaligya og shabu.

Giingon nga himuon pa usahay niini ang iyang lawak nga suyopanan sa iyang mga parok.

“Pero giimbestigar gihapon sa Basak Police station kon si kinsa ang nipatay kang Guardiana, ug kon away ba diha may labot sa drugas ang hinungdan sa pagpatay kaniya,” gitug-an ni Villaro sa mga tigbalita. FMD