Duha ka mga kinabuhi ang nangakalas sa managlahing mga pagpamusil sa Sugbo sa Sabado sa hapon, Enero 22, 2022 ug Biyernes sa hapon, Enero 21, 2022.

Sa Dakbayan sa Sugbo, namatay diha-diha ang 45 anyos nga lalake human pusila pasado ala 1 sa Sabado sa hapon sa Sityo Tugas, Barangay Mambaling, Siyudad sa Sugbo.

Si Police Staff Sergeant Reynaldo Baldo sa Mambaling Police Station, imbestigador, niila sa biktima nga si Hilbert Telmo Tabanas, alyas Adobo, 45, nagpuyo sa nahisgutang lugar.

Matod ni Baldo nga si Tabanas wa na kapaniudto human nalingaw sa sugal sa hantakan.

Samtang nagkalingaw, usa ka tawo nga nakasuot og gray nga senina niduol kang Tabanas dayon nipusil kaniya makaduha ka mga higayon nga niresulta sa iyang hinanaling kamatayon human maigo sa ulo.

“Maoy ingon sa iyang kapuyo nga nagduwa ra na og hantak si Adobo unya giduol og lalake ug gipusil.Wala na daw siya kabantay kon kinsa ang tawo kay nanagan ang mga tawo didto,”matod ni Baldo.

Dugang ni Baldo nga ang dapit sa nahitaboan sudlonon ug daghang agianan nga maoy ilang gituohan nga yano ra kaayo ang gunman nga naglakaw pagawas ug posibleng dunay kauban sa iyang pag sibat.

Ang Mambaling Police Station nagsubay pa sa motibo.

GI-AMBUSH

Namatay diha-diha ang usa ka negusyante human gipusil makadaghan sa duha ka mga tawo samtang nagmotorsiklo alas 4:10 sa hapon sa Biyernes, sa Brgy. Lawaan, lungsud sa Dumanjug.

Ang biktima giilang si Pricilla Frias Aquino, hingkod, taga Brgy. Lawaan 1, Dakbayan sa Talisay, kinsa patay nang niabot sa tambalanan sa lungsod sa Barili.

Ang biktima usa ka sub-contractor sa usa ka piggery farm sa Dumanjug.

Si Police Staff Sgt. Merlo Dapar sa Dumanjug Police Station nga nahinabi sa Superbalita Cebu nagkanayon nga si Aquino gikan nagsweldo sa iya mga tawo.

Nagsakay siya sa iyang motorsiklo padulong mopauli sa iyang giabangan nga balay sa Brgy. Ilaya, Dumanjug.

Apan sa pag-abot niya sa barangay road sa Lawaan, giatangan siya sa duha ka mga gunman nga nagsakay sa motorsiklo.

Si Aquino nakaangkog daghang mga samad pinusilan sa iyang bukobuko.

Human nahagba si Aquino, ang mga killer nisibat padulong sa lungsod sa Ronda.

Upat ka kabhang sa kalibre .45 nga armas ug usa ka slug ang nakaplagan sa crime scene.

Matod ni Dapar, nga gisubay pa nila unsay motibo sa kremin apan sa initial nilang nakuha, estrikta si Aquino sa iyang mga trabahante.

Giklaro ni Dapar nga dili tulis ang motibo sa kremin sanglit mga gamit sa biktima ug P20,000 cash nga sobra sa sweldo wa hilabti.