ORMOC City, Leyte - Walay nakalas sa Eastern Visayas sa pag-igo sa magnitude 6.5 nga linog pasado ala 1 sa hapon, Martes, Abril 23, 2019.

Ang epicenter sa linog nahimutang sa San Julian sa Eastern Samar, apan nabatyagan ang pagtay-og sa mga silingang lalawigan ug lungsod sa Kabisay-an.

Dunay mga tunghaan nga way klase kay gisusi pa ang kahimtang sa mga edipisyo, kon luwas pa ba kini.

Gi activate dayon sa Regional Disaster Risk Reduction and Management ang ilang Emergency Operations Center.

Base sa uwahing report sa RDRRMC 8, sa Abril 24, dunay 20 ka mga lungsod ug siyudad sa Eastern Visayas ang naitala nga dunay nakasinati og pagliki sa pipila ka edipisyo.

Sagad niini mga tunghaan ug opisina sa gobyerno ug duna usay mga imprastraktura.

Sa probinsya sa Leyte, naapektuhan ang pipila ka edipisyo sa Tacloban, Jaro, Babatngon, Palo ug Palompon.

Sa Eastern Samar, mao ang lungsod sa Can-avid, San Julian, Borongan, Gen. MacArthur ug Oras.

Sa Samar, mao ang syudad sa Catbalogan ug Calbayog ingon man mga lungsod sa San Jorge, Basey, Gandara, Pinabacdao ug Tarangnan.

Samtang sa Northern Samar mao ang lungsod sa Palapag ug Las Navas. Niini, pipila ka mga lokal nga kagamhanan ang nagsuspenso og trabaho gumikan sa inspeksyon sa mga building officials.

Naitala naman ang pito sa angol sa hitabo nga pulos gikan sa Northern Samar.

Mao kini sila si Ricky Pabroa, 39; Joseph Froilan, 46; Ernesto Aseo, 42; William Milagros, 48; Nikki Osal, 34; Clarita Borden ug Analyn Ibañez.

Luwas hinuon ang pito ka mga angol kahuman gidala sa duol nga tambalanan.

Balik na usab ang supply sa kuryente sa Eastern ug Northern Samar.

Pipila ka karsada ug tulay ang nakaangkon og kadaut apan maagian ra gihapon kini.

Padayon hinuon ang pag-monitor sa mga district offices sa Department of Public Works and Highways (DPWH) sa mga imprastraktura.