TULO ka mga giila nga bag-ong durugista sa syudad sa Talisay ang gisikop sa gihimong buy-bust operation sa Sitio Holy Child, Barangay Bulacao pasado ala 1 sa kaadlawon, Martes, Oktubre 23.

Ang mga dinakpan giila nga sila si Jomar Abarquez, 32-anyos, ug iyang mga kauban nga sila si John Philip Sawit Galleto, 30-anyos, ug James Ivan Labora, 32-anyos, nga mga molupyo gihapon sa maong lugar.

Gitug-an ni Police Major Gerard Ace Pelare, hepe sa Talisay City Police Station, nga subject nila sa operasyon si Abarquez, kinsa maoy gitumbok sa mga tawo nga maoy tigpayuhot og ilegal nga drugas sa ilang lugar.

Giangkon ni Pelare nga street level pusher pa lang si Abarquez diha ra sa Bulacao, apan wala na nila paabuta pa nga makapalambo kini sa ilegal nga negusyo.

Gani bisan ang mga manuyupay ang dili nila pasayluon ug lakip gyud sa pandakpon kay tinguha nila nga dili ra ang supply ang mawala kundi lakip na ang demand.

Dugang ni Pelare nga unta magsilbi na kini nga warning sa mga nagumon sa drugas nga sila sa mga pulis ang dili kapuyon sa paggukod kanila, mapa-dinagko ug ginagmay man.

Matud ni Pelare nga ang panimay ni Abarquez ang gisugdan na sa paghimu nga drug den.

Nakuha gikan kanila ang siyam ka gagmay nga pinakite sa shabu.

Ang tulo ang gipasakaan na og kaso Martes sa hapon. (FMD)