Duha ka giingong kawatan og mga motorsiklo sa siyudad ug lalawigan sa Sugbo ug kauban niini nadakpan sa hinusang operasyon sa Pardo Police Station sa Cebu City Police Office (CCPO) ug Highway Patrol Group (HPG) 7 sa Huwebes sa kaadlawon, Enero 14, 2021 sa sitio Torre, Barangay Inayawan, Siyudad sa Sugbo.

Ang mga suspek giila nga silang Cedrick Alao Jimenez, 19, ug si Chuz Bonn Granada Espinosa, 19.

Ang duha managsilingan sa sityo Nazareth, Barangay Buhisan, Dakbayan sa Sugbo.

Apil usab sa nadakpan ang kauban nga si Sam Gabriel Marayan, 19, taga sitio Manol, Barangay Tisa. Nasakmit sa kapulisan ang pito ka mga motorsiklo nga gituohan nga kinawat gikan ni Marayan.

Ang kapulisan sa Pardo sa pagpangulo ni Police Major Jose Angelo Acupinpin ningsikop sa mga akusado pinasikad sa warrants of arrest nga giluwatan ni Judge Dennis Larrobis, presiding judge sa Regional Trial Court (RTC) Branch 76 sa Siyudad sa Naga.

MODUS

Matod ni Police Major Eraño Regidor nga ang modus sa mga akusado mao ang pagkuha sa mga motorsiklo nga nag parking nga way nagbantay ilabi na sa kalungsuran.

Kon ila nang makuha, ilang ibaligya sa ilang mga kaila sa Barangay Buhisan ug Inayawan sa barato nga presyo.

“Ang modus ani nila while ang imong motor gi-park, ila nang paandaron without sa yawe. Bisan imo na siyang gitauran og koan kanang gi-lock nimo ang liog, naa na silay diskarte kon unsaon pagtangtang sa lock sa liog,” matod ni Regidor. / AYB