MACARTHUR, Leyte--Tulo ka mga lalake nasikop sa kapulisan atol sa checkpoint sa Maharlika Highway sakop sa Barangay Maya ning lungsod, alas 7 sa buntag, Martes, Hulyo 30, 2019.

Giila ang mga nasikop nga sila si Lito Mediona, 27, taga Javier, Leyte; Reynaldo Obias, 51, taga Javier, Leyte; ug Esterio Obias, 49, taga Abuyog, Leyte.

Base sa report sa kapulisan, nakadawat og tawag sa usa ka concerned citizen ang MacArthur Police Station.

Matod sa nanawag, dunay mga lalake nga kadudahan ang lihok nga nangihi daplin sa karsada, usa niini nakit-an nga dunay gitakin nga armas.

Dali nga nipahigayon og checkpoint ang kapulisan pinangulohan ni Police Lieutenant Mark Kevin Villares.

Nabantayan sa kapulisan ang usa ka motorsiklo nga nagpaingon sa checkpoint unya dunay tulo ka mga sakay.

Apan kalit kini nga niliko pagkabantay nga dunay checkpoint hinungdan nga gigukod sa kapulisan.

Naabtan ang mga suspek sa highway sakop sa Barangay Pongon ug wa na kini makapalag.

Narekober gikan kang Reynaldo ang usa ka granada; usa ka kalibre .38 revolver ug mga bala ang narekober gikan kang Mediona ug 17 pulgada nga kutsilyo ug lima ka pakete nga may gituhoang shabu ang narekober kang Esterio.

Gidala sa kapulisan sa ilang estasyon ang mga dinakpan samtang susihon kon unsay tuyo sa pagdala sa maong mga kontrabando.

Kasong kalapasan sa Republic Act 10591 kun ilegal nga paghupot og armas ug explosives ug Republic Act 9165 kun Comprehensive Dangerous Drugs Act of 2002 ang atubangon sa mga suspek. (JKDP)