Tulo ka mga tinun-an nga suspek sa pagpanunggab sa laing estudyante atol sa pagpamauli sa Miyerkules sa gabii, Septiyembre 14, 2022, gipatawag sa principal ug guidance counselor sa Mabolo National High School (MNHS)

Uban sa tulo ka mga tinun-an ang ilang mga ginikanan nga gihinabi sa guidance counselor lakip na sa hepe sa Mabolo Police station nga si Police Major Erano Regidor aron masubay kon kinsa ang nidunggab sa estudyante.

Matod ni Police Lieutenant Colonel Wilbert Parilla, deputy city director for administration sa Cebu City Police Office (CCPO), nga nagpadayon ang imbestigasyon, duna silay gihimong lakang.

Kini mao ang pag-deploy og pulis dili lang sa gawas kon dili apil na sa sulod ilabi na sa pagpamuhi sa mga tinun-an.

“Duna na tay intervention nga gibuhat, according sa chief of police sa ilang initial nga panagsabot..” matod ni Parilla.

Nakadawat og impormasyon ang kapulisan nga sakop sa duha ka grupo ang biktima ug mga suspek nga mao ang Crips ug Bloods apan wala pa nila nakompirmar.

Apan kon tinuod nga dunay gang nga naglihok sa sulod sa eskwelahan, sigun ni Parilla, ang kapulisan ug mga opisyal sa tunghaan mohimo og mga lakang aron mapakgang kini.

Gahapon sa buntag, Septiyembre 15, 2022, dunay usa ka batan-on nga giimbitar sa Mabolo Police Station sanglit siya ang gilitok sa biktima nga iyang nakontra.

Matod ni Parilla, kon masuta nga siya ang naghimo sa krimen, susihon kon nag-edad na ba kini og 15 pataas aron pasakaan og kaso o i-turnover sa Department of Social Welfare and Development.