NASIKOP sa mga sakop sa Mambaling Police ang usa ka 40 anyos nga lalake atol sa drug bust nga nakuhaan og tunga sa kilo nga gituohang shabu sa sitio Saduko barangay Duljo-Fatima dakbayan sa Sugbo, Huwebes sa gabii, Abril 25.

Ang dinakpan gila nga si Ursulino Alfafara Jr. nga nag puyo ra usab sa maong dapit.

Nakuha gikan kaniya ang 500.5 gramos nga gidudahang shabu nga mobalor og P3,403,400.

Matod ni Police Captain Francis Renz Talosig ang hepe sa Mambaling police station nga tulo ka semana nila nga gipanid-an si Alfafara.

Usa ka concern citizen ang mihatag sa impormasyon labot sa ilegal nga negosyo sa suspek nga maoy hinungdan nga ilang gihimo ang surveillance.

Human masuta nga positibo ang impormasyon ila gilayon gilusad ang buy bust operation diin ang dinakpan ilang gipalitan og 5 grams nga mobalor sa kapin sa P30,000.

Sa dihang natunol na sa suspek ang usa ka dakong putos nagpaila dayon sila nga police ug gidakop dayon siya.

Sa pag rekisa nakuha pa ang laing siyam ka bulto nga shabu nga gisulod sa large pack.

“Nabilhan natin sya ng 5 grams tapos dala nya yung other 500 grams estimated value 3.4 million,” matod ni Police Captain Francis Renz Talosig.

Wala malakip sa watch list sa Mambaling police station ang dinakpan sanglit sila nag tuo nga new player kini.

Hugot hinuon nga gihimakak ni Alfafara nga iyaha ang drugas nga nakuha gikan kaniya.

“Dili man na akoa sir, ambot kinsa na,” matod ni Alfafara.

Gipaubos pa karon sa kapulisan kung asa gikan ang supply sa ilegal nga drugas ug kinsa usab ang iyang mga customer.