GIBUTYAG sa pangulo sa City Social Welfare and Development Office (CSWDO) sa dakbayan sa Lapu-Lapu nga si Annabeth Cuizon nga adunay 4 ka staff sa Homecare Center sa Barangay Gun-ob, dakbayan sa Lapu-Lapu ang dugang na nagpositibo sa coronavirus disease 2019 (Covid-19).

Kini ang nadugang sa unang 33 ka mga nagpositibo sa pasilidad nga gilangkoban sa 31 ka menor de edad ug 2 ka staff.

Matod ni Cuizon, niadtong Lunes, Agusto 9, dugang 15 ka staff ang gipaubos na sab sa swab test human sa contact tracing.

Ang mga nagpositibo pulos asymptomatic.

Wala gibalhin sa isolation facility ang mga nagpositibo sanglit sa pasilidad na sila magpaayo sa naasoyng virus.

Nasayran nga samtang naghuwat sila sa resulta sa ilang swab test wala lang una papaulia sa ilang mga panimalay ang mga staff aron kalikayan nga makatakod usab sila sa ilang pamilya.

Adunay 3 ka mga staff sa pasilidad ang wala na usab gipa-duty gumikan kay wala pa mapaubos sa swab test human absent ug naka-leave atol sa pag-swab sa mga staff niadtong Agusto 9.

Gipasalig ni Cuizon nga dili ra maapektahan ang pag-atiman sa mga bata sa pasilidad gumikan kay mahimo ra gihapon silang atimanon sa mga staff nga nag negatibo.

Dili lang hinuon face to face ang pag-atiman ug diha lang kutub sa gibutang nga mga barrier sa pasilidad itunol ug ibutang ang panginahanglanon sa mga bata ug staff nga naka isolate sa pagkakaron.

Sa 31 ka bata nga nagpositibo usab, nasayran nga adunay 15 nga nag nagpakita og mild nga sintomas samtang 16 ang asymptomatic. (GCM)