NAPASAKA na sa kapulisan Talisay City ngadto sa piskaliya ang kasong slight physical injury under tumultuous affray batok sa unom sa rambol sa usa ka imnanan sa Barangay Lawaan 1, Talisay City.

Matud sa hepe sa kapulisan sa dakbayan sa Talisay, Police Lieutenant Colonel Randy Caballes, ang kaso ilang napasaka niadtong Huwebes sa buntag, Marso 17.

Giila ni Caballes ang napasakaan nga sila si Charles Toribio, Gerald Regay, Alvin Cedeño, Frederick Brian Indoy, Raven Franza ug Stephine Novo nga pulos na hingkod na sa edad.

Samtang ang tulo nga naapil sa karambola nga pulos menor de edad, gihatag na sa barangay ang gahom aron sila ang mohimo og lakang sa angay buhaton sa tulo.

Kahinumdoman nga nag-viral ang video niining mga batan-on nga nagrambol sulod sa usa ka imnanan sa Barangay Lawaan 1 sa nahisgutang siyudad niadtong Marso 11, 2022.

Ang grupo ni Adrian Cabrillos uban sa lima ka mga kauban nireklamo sa kapulisan sa nahitabo kanila.

Samtang si Caballes naninguha aron dili na masubli pa ang karambola sa mga batan-on, nihan-ay na og iskedyul sa usa ka adlaw nga pakigpulong ngadto na sa dili moubos sa 15 ka mga bar ug restaurant owner aron mahisgutan ang mga pagabuhaton nga dili na masubli pa ang maong kagubot.

Wala pa hinuoy tukma nga adlaw nga gihatag ni Caballes tungod kay nangita pa kini og haum nga lugar kon asa magtagbo.

Ang rambol sa mga batan-on sa mga imnanan sunodsunod nga nahitabo nunot sa pagluag na sa kuwarentina ug pag-abli sa daghang mga establisemento.

Sa dakbayan sa Sugbo, nahitabo usab ang rambol sa mga batan-on gawas sa usa ka imnanan sa Salinas Drive sa Barangay Lahug.