UNOM ka mga lalake ang nasikop sa kapulisan sa dakbayan sa Mandaue nga nakuhaan og ilegal nga drugas sa checkpoint sa Zuellig St., Barangay Centro, dakbayan sa Mandaue niadtong Sabado sa gabii hangtod sa Dominggo sa kaadlawon.

Matod ni PCInsp Aldrin Villacampa sa Station 1 sa Mandaue City Police Office (MCPO) nga naghimo sila og kinalit nga checkpoint niadtong Sabado sa gabii uban sa iyang mga kawani.

Unang nasikop sa operatiba mao ang mga taga Brgy. Poblacion, Cordova nga nasikop mga alas 11:30 sa gabii.

Ang mga suspek giila nga si Jeffrey Crisostomo, 33, ug Ariel Canete, 46. Nakuha gikan kanila ang 25 ka gagmayng pakete sa gituohang shabu.

Matod ni Villacampa nga gikan sa Carbon nikuha si Crisostomo sa nakuha nga ilegal nga drugas samtang si Canete igo lang nipasangil nga nagdrayb lang siya sa motor.

Human sa duha ka oras, ang taga Sitio Litub, Brgy. Kalawisan, dakbayan sa Lapu-Lapu sab ang nasikop sa Station 1 mga ala 1:30 sa kadlawon.

Ang mga suspek giilang sila si Junard Inihao, 35 ug drayber nga si Mariano Anga, 37.

Nakuha sa kapulisan gikan sa duha ang 2 ka medium-sized ug usa ka gamayng pakete sa gituohang shabu.

Nasuta ning mantalaan gikan ni Villacampa nga ang drugas gikan ni Inihao gikan pa sa Brgy Duljo- Fatima, sa dakbayan sa Sugbo.

Pagka-alas dos sa kaadlawon, laing duha ka mga lalake gikan sa Brgy. Casili, Consolacion ang nasikop sa grupo ni Villacampa.

Nakuhaan og 2 ka gagmayng pakete sa gituohang shabu sila si Emilio Sabero, 41, ug Jesus Virtudazo, 50. Sila gibalhug sa Station 1 sa Mandaue. JPP