MOABOT ngadto sa 75 ka mga tawo ang nasikop sa gihimong ant-illegal gambling operation nga gilusad sa kapulisan sa Central Visayas (CV) nunot sa kamandoan sa kampo Crame nga gukdon ang tanang matang sa ilegal nga kalihukan.

Niadtong Dominggo sa gabii, Enero 26, ang mga sakop sa Criminal Investigation and Detection Group (CIDG) 7 mi ronda sa mga nagpadagan sa illegal gambling sa barangay Talamban ug Pulang Bato sa siyudad sa Sugbo nga miresulta sa pagkasikop sa lima ka mga ushers.

Matod ni Police Lieutenant Colonel Allan Tolosa, ang deputy regional chief sa CIDG 7, nga ilang naabtan ang lima nga nagpataya sa mga tawo nga mopatad sa swertres.

Dugang ni Tolosa nga bugtong ang Globaltek lang ang gitahasan sa Philippine Charity Sweepstakes Office (PCSO) nga mag-operate sa Peryahan ng bayan apan adunay misunod niini.

“Kini gyud sila ang naga pataya mismo nya naabtan nato ni sila, swertres ang ilang gipataya nga maoy common karon kay ang Cebu City sa pagkakaron wala pa may small town lottery,” matod ni Tolosa.

Samtang sa Cebu City Police Office (CCPO), moabot nausab sa 70 ang ilang nasikop sukad Enero 23 ngadto na sa 24 human sa Sinulog 2020.

Nakalusad na silag 53 ka anti illegal gambling operation sa 11 ka police stations ug special units.

Apan nabantayan nga human sa gihimong operation namalik na usab sa pag operate ang mga illegal gambling operators.

Tungod niini subsob usab ang ilang monitoring sa kabarangayan uban sa pag awhag sa mga barangay officials nga moabag sila sa pag bantay sa illegal gambling sa ilang dapit.

Si Police Brigadier General Domingo Cabillan, Deputy Regional Director for Administration sa Police Regional Office (PRO)7, nagkanayon nga seryoso ang pamunoan ni Brigadier General Valeriano de Leon sa kampanya sa illegal gambling.

Kini nunot sa kamandoan sa bag-ong milingkod nga PNP Chief nga gukdon ang nagpasiugda sa illegal numbers game tungod kay mireklamo na ang PCSO gumikan sa kahinay sa ilang halin.

“We will not tolerate as mandated by our regional director ang illegal gambling. Kung sino man ang kapulisan dyan dapat isumbong sa amin para mahuli natin,” matod ni Cabillan.

Awhag ni Cabillan sa mga nagpadagan sa illegal gambling sa Central Visayas nga hunungon na kini aron abagan ang PCSO nga makakuhag ginansya alang sa mga kabus nga makabenepisyo niini ngadto sa katawhan labi na sa medikal nga tabang. (AYB)