DUNAY walo ka mga pasyente sa coronavirus disease (Covid-19) sa Dakbayan sa Lapu-Lapu nga naulian na.

Mao kini ang pahibawo ni Lapu-Lapu City Mayor Junard "Ahong" Chan sa iyang Facebook post sa Sabado, Hunyo 13, 2020.

Matod ni Chan nga ang walo tagsa-tagsang gipanghatod ngadto sa ilang mga balay sa City Disaster Risk Reduction Management Office (CDRRMO) team sa Sabado sa buntag.

"Maayong balita ang misugat kanato niining buntaga kay walo sa atong mga igsuon ang nakalingkawas na sa Covid-19. Sila ang atong mga bag-ong Covid warriors nga nagpamatuod nga ang mga Oponganon adunay dugo sa manlalaban o fighter nga sama sa dugo sa atong unang bayani nga si Lapu-Lapu. Malipayon na silang gihatod sa atong DRRMO Team sa ilang mga pinuy-anan para makapiling na nila pag-usab ang ilang pamilya," nagkanayon si Chan.

Ang paggawas sa walo naghatod sa tanang nangaayo ngadto sa 68.

Ang walo nagagikan sa Santa Maria, Pusok (2); Poblacion, Mactan (2); Cecilia Homes (1); Sityo Kulo, Marigondon (1); Sityo Buyong, Maribago (1); OFW gikan sa Iloilo (1).

Moabot na usab og 74 ka mga pasyente ang nagpaalim pa kun recovering.

Ang Lapu-Lapu City nitala og duha ka mga kamatayon tungod sa Covid samtang laing 10 nga namatay nga dunay laing mga sakit "secondary to Covid."

Si Chan niingon nga masaligon siya nga ang tanang mga pasyente nga naa sa isolation facilities ug mga tambalanan sa dakbayan luwas nga mahiuli. (REV)