TINGUHA sa kagamhanan sa lalawigan sa Sugbo ug Department of Tourism (DOT) 7 nga mailhan isip diving spot ang kadagatan sa Lungsod sa Aloguinsan.
Usa kini sa hinungdan nga ang DOT 7 mopasiugda sa DIVE7 Festivals Dive Aloguinsan karong Hulyo 29-31 sa Hermits Cove, paagi nga mas makadani og atensyon nga magdala unya og dugang turista ug bisita sa probinsya.
Matod ni DOT 7 Director Shalimar Tamano, potensiyal ang Aloguinsan nga kadangpan sa divers ug mahiligon sa adventure.
“Gov., this is historic. Why? Because it is potential but is not (yet) recognized (as) dive destination. And if you succeed in doing this, because this is your idea, then you have opened up a new dive destination in the province,” matod ni Tamano pinaagi sa Provincial Information Office.
Si Cebu Governor Gwendolyn Garcia nimando ni Tamano nga mangita og lain pa nga circuit diving sites sa probinsya.
Sa kasamtangan, nalakip sa iladong diving sites ang lungsod sa Moalboal, Cordova ug isla sa Malapascua sa Lungsod sa Daanbantayan sa amihanan sa Sugbo. (ANV)