GAWAS sa police cars, dili usab bakwion sa kagamhanan sa lalawigan sa Sugbo ang mga ambulansya nga giisyu ngadto sa provincial ug district hospitals nga gidumala niini.

Kini, samtang gipahinumduman ni Gobernador Gwen Garcia ang tanang chiefs of hospitals ug medical staff nga estrikto motuman sa iyang kamandoan nga dili mokolekta og bayad o donasyon kon gamiton sa mga pasyente ang mga ambulansya.

Kini base sa Memorandum Circular No. 10-2019 pinetsahan og Hulyo 5, 2019 nga giisyu sa gobernador.

“Ilibre nana ang ambulansya basta magdala’g pasyente, mao man nay gamit sa ambulance. Dili lagi na gamiton para ipangumpra or i-picnic,” sumala sa gobernador dihang nahinabi sa mga tigbalita niadtong Biyernes, Hulyo 5.

Iyang gidasig ang mga tagtungod sa mga pasyente nga modirecho sa iyang buhatan sa Kapitolyo ug isumbong kon gipabayad sila sa ospital sa paggamit og ambulansya.

“Basta naa tay klaro nga pangan, kanus-a, unsang petsaha gipabayad sila after I shall have issued my memorandum. Gai lang pud mi og specifics. Dili lang pud magsige og reklamo unya way pangan, way adlaw, unsaon man nato verify ana. Diretso diri sa Governor’s Office,” matod ni Garcia.

Sa samang memorandum, kini nagpahibawo sa Provincial General Services Office (PGSO) nga ipabilin sa mga provincial ug district hospitals ang mga ambulansya basta lang sa emerhensiya ang katuyoan sa paggamit ug wala nay lain.

Dili siya gusto maapektuhan ang serbisyo sa maong mga tambalanan kon bawian sa mga ambulansya.

“They do not need to be recalled, ang kato rang giisyu sa munisipyo maoy atong gipa-recall,” dugang ni Garcia.

Sa iyang pag-asumir pagka gobernador human sa udto niadtong Hunyo 30, niisyu kini og Memorandum Circular No. 2 nga nagmando sa PGSO nga i-recall ang tanang mga sakyanan ug ekipo nga gi-assigned pinaagi sa Memorandum Receipt ngadto sa lainlaing mga local government unit ug mga buhatan.

Apan atol sa tigom uban ang kapulisan pinangulohan ni Police Regional Office (PRO) 7 Director Debold Sinas, si Garcia nipahibawo nga dili na bakwion sa Kapitolyo ang police cars aron dili mabalda ang ilang operasyon matag adlaw. (SCG)