HUGOT nag-monitor ang African Swine Fever Task Force sa probinsya sa Sugbo sa mga pantalan aron pagseguro nga way makasulod nga mga produkto sa baboy gikan sa mga lugar nga apektado sa virus.

Ang task force nag-monitor sa tanang pabtalan sa probinsya dili lang sa mga buhi o karneng baboy, apan naglakip sa pipila ka mga pork ug meat products labi na ang gikan sa kaulohan nga dunay kompirmadong kaso sa ASF.

Kagahapon, Miyerkules, Oktubre 2, gipangulohan sa ASF Task Force sa probinsya sa Sugbo ang pagsunog sa 104 kilos nga mga produkto pinaagi sa pugon sa Environmental Management Bureau (EMB) sa Barangay Umapad, siyudad sa Mandaue.

Gipaagi kini sa thermal destruction sama sa mga chorizo, skinless, mga linata, kinilo nga lechon, adobo ug ubang pagkaon nga nasakmit ug gisurender sa mga gagmay’ng tindahan ug sa mga tawo nga misud ug migawas sa sugbo.

Lakip sa giestrikto karon ang pagparehistro sa backyard hog raisers ngadto sa Provincial Veterinary Office (PVO). (ANV)