KON mag-drive, ayaw pag-text. Mao ni ang leksyon nga nakat-unan sa usa ka lalake nga naaksidente nga nagmaneho sa iyang awto samtang nag-text.

Ang drayber naangol human nikaliring ug nalimbuwad ang iyang gimaneho nga sakyanan sa dalan Ganciang sa Barangay Basak San Nicolas, Siyudad sa Sugbo, pasado alas 11 sa Biyernes sa gabii, Septiyembre 18, 2020.

Si Police Executive Master Sergeant Felomino Viquezo sa Mambaling Police Station, traffic investigator, mibutyag nga usa lang ka “self accident” ang nahitabo kay ang awto way gikabangga ug didto lang sa usa ka kahon sa tanom nilahos.

Naangol ang drayber nga si Marcelino Ungria, lumolupyo sa maong dapit. Matod ni Viquezo nga luwas ra si Ungria, apan ang sakyanan niini maoy naghayang sa dalan human malimbuwad gikan sa pagkaliring.

Matod ni Viquezo nga si Ungria igo lang ni-reply sa text message gikan sa iyang amahan.

Gituohan ni Viquezo nga wa makabantay si Ungria nga nipaingon na siya sa daplin sa dalan.

Sa iyang pagtan-aw og utro sa atubangan sa manubela, ulahi na kay nituyok na ang iyang panan-aw kay nikaliring na ang sakyanan dayon nalimbuwad. (BBT)