Usa ka semana human gilibkas ang liquor ban, usa ka establisemento ang gipadad-an og show cause order human niabot sa City Hall ang reklamo labot sa paglapas sa social distancing sulod niini.

Si Cebu City Mayor Edgardo Labella niingon nga ang establisemento gimandoan sa pagpasabot kalabot sa insidente.

Hinuon, matod ni Labella nga usa lang kini sa 170 ka mga establisemento nga gihatagan og special permit sa Siyudad aron makapamaligya og ilimnong makahubog.

Si Business Permit and Licensing Office (BPLO) head Jared Limquiaco niingon nga ang establisemento usa ka bar, apan wa siya maghisgot kon asa nahimutang.

Matod ni Limquiaco nga naghuwat ang iyang buhatan sa pagpasabot sa bar operators pinaagi sa usa ka suwat.

Kon di madawat ang pagpasabot sa operators, ang bar hatagan sa unang warning. (JJL)