TUNGOD sa pagbunok sa kusog nga ulan sa pipila ka bahin sa Sugbo, sama sa dakbayan sa Sugbo, Mandaue ug ubang parte sa probinsya, niawas ang Mahiga creek, Dominggo sa hapon hangtud na sa gabii, Hunyo 23.

Hinungdan nga nakamugna kini og pagbaha sa kadalanan sa habig sa Barangay Subangdaku sa Mandaue City ug sa Barangay Mabolo, siyudad sa Sugbo.

Nakita nga daghang basura ang nakabara sa taytayan sa habig sa Innodata sa Subangdaku.

Matud ni Jay Basubas, Mandaue City Disaster Risk Reduction and Management Office (MCDRRMO) officer, nga na-monitor nila nga nagsugod pagtaas ang level sa tubig sa maong sapa sa alas 3:50 sa ominggo sa hapon.

Hinungdan nga niawas kini ug nakabaha nga moabot sa hapit na tuhod sa tawo.

Dali nga nagpatabang ang MCDRRMO sa General Services Office ug sa clean and green sa barangay Subangdaku aron mahinayhinay sa pagkuha ang mga basura nga kasagaran mga plastic bottle ug uban pa.

Nihangyo usab sila sa mga sakop sa Traffic Enforcement Agency of Mandaue (TEAM) alang sa pagpa-detour sa ubang mga motorista nga posibleng matanggong.

Ug nipadala sa mga government vehicle nga maoy mamahimo nga mohatud sa mga residente sa Mandaue City o sa silingang lungsod ug syudad sama sa Consolacion ug syudad sa Lapu-lapu, kinsa nanga-stranded sa maong lugar, tungod sa kusog nga ulan ug pagbaha.

Ang Mahiga creek ang nahimutang sa boundary sa dakbayan sa Mandaue ug sa syudad sa Sugbo, ug lahus kini ngadto sa kadagatan sa may North Recalamation Area.

Usa sa nakita usab nila nga nakatampo nga mas nakataas ang tubig sa Mahiga creek mao ang taas usab nga level sa dagat kon taob.

Matud ni Basubas nga ilang nabantayan nga kon moulan sa habig lang sa dakbayan sa Mandaue, dili ra moawas ang maong creek, apan kon parehong makasinati og ulan ang dakbayan sa Mandaue ug syudad sa Sugbo, hinungdan nga moawas kini.

Dugang ni Basubas nga dali usab sila nga nakig-alayon sa Cebu City Disaster Risk Reducation and Management Office, pinaagi ni Harold Alcontin, aron usab sa paghimo sa ilang mga aksyon, ilabi na ang pagpakuha sa mga nakabara nga basura. (FMD)