ANG Regional Intelligence Division (RID) 7 makig-alayon sa Department of Social Welfare and Development (DSWD) aron sabutan ang bahin sa pagluwas sa 9 anyos nga bata nga lalaki nga gihimong drug courier sulod sa katulo ka higayon sa nadakpan nga si Mark Secretaria Duaban alyas ‘Pastor.’

Matud ni Police Colonel Glenn Mayam, pangulo sa Regional Intelligence Division (RID) 7 nga ekslusibong nahinabi sa Superbalita Cebu ug SunStar Cebu, nga sa sunod nga mga adlaw mao kini ang ilang lihukon.

Dugang ni Mayam nga uban sa personnel sa DSWD ug Womens Children and Protection Desk (WCPD) 7 sa kapulisan, ilang pangitaon ang nahimutangan sa bata ubos sa paggiya sa RID 7.

“We will check kung ano ang sasabihin nang bata. Doon tayo gagawa nang hakbang, na mga plano,” matod ni Mayam.

Sa testimonya ni Duaban, kinsa nakuhaan og kapin sa duha ka kilo nga shabu, atol sa interview kaniya sa SunStar Cebu Facebook Page Live l, giangkon niya nga sulod sa Marso, katulo na siya gihatdan og kinilo nga drugas nga ang bata maoy gjhimong drug courier.

Una niadtong Marso 5, ikaduha sa Marso 12 ug ang katapusan diin kanus-a siya nadakpan niadtong Marso 16 sa gabii.

Sa pamahayag ni Duaban nga sa Marso 5 ug 12 ning buwana, tag usa ka kilo ang nahatag kaniya samtang sa Marso 16 duha ka kilo sa shabu ang iyang nadawat.

Samtang gihulagway sa RID 7 nga sa pagkasikop ni Duaban, nakibhangan ang supply sa drugas sa merkado ilabi na sa Metro Cebu tungod sa ka dako sa nasakmit sa mga operatiba sa RPDEU 7.

“Actually nabawasan talaga ang supply nila kasi malaki tong nahuli natin..,” dugang ni Mayam.

Ang dinakpan ig-agaw sa kanhi inilang druglord nga naglihok sa Bohol ug Cebu nga si anhing Rowen ‘Yawa’ Secretaria nga kanhi tawo ni anhing druglord sa Sugbo nga si Jeffrey ‘Jaguar’ Diaz.

Sa pangangkon ni Duaban, nahimo siyang tawo sa laing inilang druglord usab nga si anhing Crisostomo “Tata Negro” Llaguno, dugang sa kapulisan.