GIINGONG gituyo ug sunog sa dili momenos napulo ka mga wala mailhing tawo ang buhatan sa kontroberysal nga Kapa- Community Ministry International Kabus Padatuon nga naa nahimutang sa Barangay Poblacion, lungsod sa Compostela, Probinsya sa Sugbo alas 1:45 sa kaadlawon, Hunyo 8.

Matod ni SFO1 Gina Labay, ang chief investigator sa Bureau of Fire Protection (BFP) sa lungsod sa Compostela nga nahinabi sa sibyaanang DyMF Bombo Radyo Cebu nga usa ka Edward Dagatan ang mipahibawo kanila nga adunay nasunog sa Barangay Poblacion.

Apan sa ilang pag-abot kusog na kaayo ang kayo sa duha ka building nga giingong gipanag-iya na sa Kapa.

Giingong nag sugod ang kayo sa ika duhang andana sa building ug dali ni nga mikatap sa ubos nga bahin.

Aduna silay nakita nga mga galloon sa luyo sa building nga gituohan nga maoy gisudlan sa gasoline nga maoy gigamit tuyo nga pag sunog apan mohimo pa silag lawom nga imbestigasyon.

Ang giingong mga nagpuyo sa building ang mi reklamo nga matod pa gipang kuha sa mga suspek ang ilang mga cellular phones lakip na ang vault sa ilang opisina nga adunay dakong kantidad sa salapi ang naa niini.

“Ongoing pa ang imbestigasyon kay ang ingun nila arson with robbery kay naa may container sa luyo sa building ug gipang kuha daw ang ilang mga cellphones,” matod ni SFO1 Gina Labay sa interview sa Bombo Radyo.