MAKADAGINOT na unya og P400,000 nga binuwan nga abangan ang Mactan Cebu International Airport Authority (MCIAA) alang sa ilang administration office sa Waterfront Mactan Hotel and Casino, Lapu-Lapu City sa higayon nga mobarog na ang ilang operations building.

Gipahigayon kagahapon sa buntag, Martes, Disyembre 18, ang groundbreaking ceremony alang sa MCIAA operations building nga mahimutang sa old Silangan area, MCIAA Complex, Airport Road, Lapu-Lapu City.

Gipahibawo ni MCIAA General Manager Atty. Steve Dicdican nga ang 5-storey building adunay gitagana nga budget nga moabot sa P740 milyones kansang desinyo susama sa bag-ong terminal 2 sa maong tugpahanan.

Sukad pa niadtong 2014 napugos sa pagpangabang ang admin office sa MCIA diha sa Waterfront Mactan sa dihang nagsugod ang expansion sa airport terminal diin nahimutang ang orihinal nga admin office.

Gibutyag sa opisyal nga moabot ngadto sa P400,000 ang ilang abangan sa Waterfront Mactan matag buwan.

“It’s high time we have our own building,” matod ni Dicdican.

Sud sa usa ka tuig ang pagtrabaho sa maong operations building diin sa unang bahin sa Enero 2019 kasugdan na ang construction sa higayon nga ma-award sa mapili nga contractor.

Gipanglantawan ni Dicdican nga hayan sa 2020 makabalhin na ang mga kawani sa MCIAA sa ilang kaugalingong building. FVQ