SI MAYOR-elect Edgardo Labella niingon nga himuon niyang duha ka tuig ang expiration date o renewal sa mga mayor’s business permit nga iisyu sa Cebu City Government.

Gihulagway sa umaabot nga mayor nga dili na unya magpunsisok ang mga tawo nga maglinya matag tuig para lang ma-renew ang ilang permit sa pagnegusyo.

“I will ask our ally in the City Council to pass a legislation that the processing of business permit will be done only in every two years,” padayag ni Labella.

Dunay pito ka mga konsehal sa konseho sa dakbayan nga mga alyado ni Labella pinangulohan ni councilor-elect Raymond Garcia.

Ang kasamtangang bise mayor niingon nga gusto niyang ipaabot ngadto sa mga negusyante sa dakbayan nga mahigalaon ang Cebu City ngadto sa mga investor.

“We have to create a business friendly atmosphere, of course they will pay the business tax yearly,” dugang ni Labella.

Sa administrasyon ni out-going Mayor Tomas Osmeña, daghan sa mga negusyo ang iyang gipasirad-an gumikan sa pagnegusyo nga walay permiso.

Una ang Rico’s Lechon, Vic Enterprises, Jerome’s Pawnshop ug daghan pang uban.

Si Osmeña, kinsa maoy nag-represent sa Cebu City Government adunay mga daghang kaso nga gipasaka batok sa mga investor labi na sa SM Prime Holdings Incorporated.

Si Labella nidugang nga hatagan og igo nga higayon ang mga negusyante nga makakompleto sa mga rekisito sa pagnegusyo sanglit matod pa niya, ang mga magpapatigayon dili modagan kay ang ilang negusyo nagbase sa Cebu ug angay pabayron sa ilang business.

Samtang, ang plano nga paghimo nga duha ka tuig sa business permit gitun-an pa pag-ayo ni Labella labi na ang detalye niini sama sa mga tinuig nga bayrunon ug uban pa nga makonsiderar sa pandayon nga ordinansa alang niini. (PAC)